الخميس، 15 أبريل، 2010

كفارة يابهاء عقبال الافراج عن مصر














يوم طويل ومرهق انتهى نهاية سعيدة الحمد لله قضاء مصر الشامخ انتصر للحق ورد الظلم عن الناشط بهاء صابر وتم الافراج عنه بكفالة 5 الاف جنية هتفنا كلنا ورقصت قلوبنا واحنا شايلين علم مصر الحبيب وانضم الينا عدد من المواطنين صقفوا وزغردوا معنا وهتفوا قاضي مصر قالها قوية قاضي مصر قالها صريحة التعذيب عار وفضيحة ياقاضينا ياهمام شكرا على الافراج التام اكتب على كل الميادين الحرية لشعب مصر الحرية لكل سجين وطبعا كان لازم ومن كل بد ان نردد هتافنا الدائم المحبوب اللي بيرقص القلوب هية بتقولوا اية ياولاد؟ عارفينه طبعا يسقط يسسسسسسسسسسقط حسني مبارك

اما مفاجاة اليوم فكان ولد تحفة اسمه بيشوي فضل ساكت ساكت وفجأة وعلى طريقة الافراح الشعبية راح باصص لفوق وقال الاااااااا بهاء بقول لامن الدولة ايه؟ فردينا ايه؟


رد بشوي كوتوموتو واحنا كملنا غنينا معاه كوتوموتو ياحلوة يابطة نبي حارسك ياختي ياقطة يا صغير بوسة لامه ياخواتي يسلم فمه وكان شكل بتوع الامن هيفرقعوا م الغيظ ودي صورنا واحنا بنهتف في المحكمة وبعدين ع القهوة مستنين خروج بهاء من قسم الازبكية بعد دفع الكفالةوكان معانا شاب من المحلة انضم لينا واحنا في الاتوبيس وقرر يجي معانا يساند بها وكمان ست قمراية من باب الشعرية والله العظيم احنا شعب حكاية وبكرة نخلص من همنا الكبير كفارة يابهاء وعقبال الافراج الكبير عن مصر كلها يعني اضربوا 80 مليون في 5تلاف جنية اقولكم احسبوها على مهلكم انا ورايا عيال عايزة اقعد معاهم شوية


ملاحظة مهمة والا ابقى ندلة وحرامية وجبانة والعيش والملح وحاجات كده الصور من تصوير الصحفية والناشطة اميرة الطحاوي وفيه صور اكتر على مدونتها كشف http://kashfun.blogspot.com/

ليست هناك تعليقات: